उत्तराखंड पलायन पर कविता

उत्तराखंड पलायन पर कविता

य कस बख़्त आय
बाड़ै ल उज्याड़ खाय
जनम भरी कमै परि
ढेड़ुवा पहरु लगाय
                  य कस बख़्त आय
                  बाड़ै ल उज्याड़ खाय

रीत् छुटि प्रीति छुटि
टुटि गो छ परिवार्
रुपैनूं की टकि यसी लागि
घर -जंगोउ मार् मार
                   य कस बख़्त आय
                   बाड़ै ल उज्याड़ खाय
गौं-गौंनूं में सड़क दौड़ी 
इतुकै भ यो विकास
देबदा च्यल ताइ हालि बे
भाजि गो दिलि क् पास
                  य कस बख़्त आय
                  बाड़ै ल उज्याड़ खाय
पहाड़ खनीं गाड़ खनीं
खनीं गौला ,गगास
किलमौड़ की जड़ ल गई
देसि बणिंयों पास
                 य कस बख़्त आय
                 बाड़ै ल उज्याड़ खाय
खाव ल टुट मुहाव टुट
टुट गईं नौव धार्
सौवक् डाव चढ़ि रौछ
बांजक ख्वार् हमार्
                य कस बख़्त आय
                बाड़ै ल उज्याड़ खाय
हाङ क् डाव भ य सरकारि 
उ पर निं रय  हक हमार
आग जलौंह क्यौण् न हांति
पटवारि क कुड़ि बहार
                 
                य कस बख़्त आय
                बाड़ै ल उज्याड़ खाय
गौं बंजिंया घर बंजिंया
बंजी गो सब कारोबार्
भरपाटि त बानर न्है गईं
सुंअरूं खनि दि या क्यार
                य कस बख़्त आय
                बाड़ै ल उज्याड़ खाय
घर घरौं स्कूल खुलि
किताबूं भरभार्
पढि लिखीं खूबै है गईं
मर गो छ आचार्
               य कस बख़्त आय
               बाड़ै ल उज्याड़ खाय
बुढ़ बिधाव् घर में छुटिं
भाग क कपाव् फुटि
नाति नातिणं सब हराईं
माय मामुत सबूं कि छूटि
              य कस बख़्त आय 
              बाड़ै ल उज्याड़ खाय

Tag

उत्तराखंड राज्य स्थापना दिवस पर कविता

मेरा सपना अपना उत्तराखंड पर कविता

उत्तराखंड कविता कोश

उत्तराखंड की संस्कृति पर कविता